⁃ لو مو مرتاح لحالك، ما رح ترتاح لما ترتبط.

⁃ شريك حياتك ما معو مفتاح سحري يحللك كل مشاكلك وصراعاتك.

⁃ حل مشكلة "الوحدة" اللي ملازمتك معتمد عليك بشكل كبير.. معتمد على انك تلاقي هدف تعيش كرمالو وانك تبني علاقة صح بينك وبين نفسك بالأول.

⁃ ما في بني ادم رح يملي الفراغ بحياتك بالذات لو الفراغ هاد من جواتك .

⁃ لو ما عشت كام سنة لحالك تكتشف حالك وميولك ومواهبك وطريقة حياتك وشخصيتك.. رح تضل ضايع وتضيع اللي مرتبط فيه معك .. لأنو انت بالاساس مو عرفان شو بدك.

⁃ حاول تغيّر صيغة دعواتك بالموضوع هاد من "يارب ابعتلي شريك حياتي"، لـ "يارب جهزني لاقدر كون شريك حياة مناسب".

⁃ ماحدا رح يتغيّر مشانك، وانت ما رح تتغيّر مشان حدا.. هي فقاعة وهمية من المشاعر بتفرط بعد اول كام شهر من العلاقة.. اللي فيه طبع ما بيغيرو (الا قليل كتير ولأسباب غير الارتباط).. من الاخر ماتحط امل كتير على الموضوع، خود اللي قدامك على حالو وماتحلم كتير انك تغيرو.

⁃ طريقة الزواج ماعاد تحدد نجاحو بالمطلق، قصص حب فظيعة بتنتهي بزواج فاشل، وزواج هادي بسيط بيكمل بحياة سعيدة .. العبرة مو بالطريقة.. العبرة بالحب (حتى لو بعد الزواج).

⁃ كتر العلاقات العاطفية يمكن بيكبّر وبيعطي خبرة.. بس بنفس الوقت بيبهدل المشاعر وبيترك جروح بالقلب ممكن تقعد سنين ماتطيب.. ماتستعجل على كلمة "بحبك" لأنو في تكلفة رح تندفع.

⁃ رب العالمين عاطيك نعمة العقل لحتى تعرف تختار صح، مو لحتى لما تفشل ترمي اخطائك عكل الناس لي ما الهن علاقة بالقصة وتنفد حالك.